ازاي بفتكر كل حاجة بتعلمها

أساسيات الأساسيات

أهلا بيك تاني يا صديقي طيب انا عارف انك غالبا زيي وبتقول في دماغك يلا بقي مش هنبتدي نتكلم عن ميكروسوفت 365 ولا ايه  هنبتدي بس لازم قبل ما نبتدي زي ما قولتلك المرة اللي فاتت نرمي الاساس اللي هنقدر نبني عليه المعرفة بتاعتنا عن المنتج او المنتجات المختلفة اللي جوا ميكروسوفت أنا مش عايز اقول معلومات او نصايح و تريكس ونبقي دخلنا في المفاهيم المتقدمة علي طول كدا يبقي انا معملتش حاجة ولا عملت دوري صح, وانت هتلاقي نفسك بتعاني قدام لما تجيلك حاجة مختلفة او لما الحاجة اللي انت اتعلمتها يتبني عليها حاجة جديدة هتبقي بالنسبالك عجيبة وانا صغير كنت شاطر جدا في التاريخ و الادب, كنت شاطر فيهم لدرجة اني بعمل ملخصات للمدرسة كلها عشان تخش بيها الامتحان,بس دي مش نقطتنا النقطة هي اني في التاريخ كنت بحفظ بس في  الادب كنت بفهم, ولما دخلت ألسن وذاكرت أدب تاني من 3 سنين أدركت اهمية الفهم لانك لما تحاول فعليا انك تعيش حياتك في توافق مع الواقع اللي انت عايزه ف أنت عايز يبقي عندك فهم عميق عن ازاي وليه بتعمل حاجة 

 عشان كدا الاساسيات مهمة جدا, خليني أوضح دا بمثال تاني لو انت عارف تفاضل كويس جدا انهاردا دا غالبا مش هيخدمك في شغلك ولا البيزنس بتاعك 

لكنك لو عارف الحسابيات ف دا هيساعدك فعلا من أنك تحسب الفلوس وانت في السوبر ماركت لحد انك تعرف قيمة البيزنس بتاعك قيمة الاستثمار بتاعك اللي انت بتعمله 

ف أنك تفهم العمليات الحسابية الاساسية فهم كويس دا احسن بكتير من حفظ القوانين المتقدمة بتاعت التفاضل مع أحترامي للتفاضل يعني بالمناسبة دي عايز اقولك ان واحد زي Richard Feynmanفي محاضرة من محاضراته خد الناس من عد الارقام علي الايد لحد مفاهيم متقدمة زي التفاضل في 4 صفح بس 

تخيل انه فهم الارقام ك مستوي اساسي او بدائي جدا لدرجة انه مضطرش انه يحفظ اي حاجة اللي عايز أوصله انه لو انت بتحفظ ف دا دليل علي انك مفهمتش, انت المفروض يبقي عندك المقدرة أنك تفهم الحاجة عشان توصل لمرحلة أنك لما تقرأ الحاجة تفهم في ساعتها المفهوم اللي بتقرأه لأنك فهمت الاساسيات بتاعت الحاجة دي ف اي حاجة هتقراها بعد كدا هتقدر تفهمها في ساعتها ودا مهم جدا في شغلتك ك واحد بتاع اي تي او "كمبيوتر" لان المفاهيم كل يوم بيتبني عليها حاجات جديدة هي هي نفس الarchitecture 

بس اتبني عليها حاجة جديد او اتاخدت وأتعمل عليها تعديل هتلاقي نفسك بمجرد ما بتقرا الحاجة الجديدة دي فهمت هو عايز ايه ورايح فين وبيعمل ايه لأنك عندك أساسيات صلبة

بالمناسبة أنا في شغلي بشوف كل يوم ايرورز جديدة وأشكال مختلفة للأيرور بس بطلت احفظ الايرور لكن أبتديت ابص للايرورز بشكل مختلف,اني احاول افهم الايرور دا يرمز لأيه,الايرور ذات نفسه بيقول أيه ؟ بغض النظر ان ساعات الايرور بيشرح نفسه, لكن كذا ايرور بيبقو بيرمزو لنفس الحاجة بس أشكالهم مختلفة 

اللي بقوله دا أتمني انك مش تاخده علي ميكروسوفت 365 بس لكن تاخده علي الحياة بشكل عام  

اشوفك الاسبوع الجاي 

يومك جميل